Blogs & Resources

လူငယ်တစ်ယောက်အောင်မြင်ဖို့အတွက် သိထားသင့်တဲ့ အချက် ၁၀ ချက် ၁။ မိဘရဲ့ ချမ်းသာသောစည်းစိမ်ဥစ္စာတွေကို ခဏမေ့ထားပါ။ တစ်ကယ်လို့များ သင့်မိဘက သင်ကိုငွေကြေးထောက်ပံ့ပေးနိုင်တဲ့အင်အားတစ်ခုရှိတယ်ဆိုရင် မိဘအကူအညီမပါဘဲနဲ့ ဘယ်အရာတွေကိုသင်လုပ်နိုင်ပြီလဲဆိုတာကို စူးစမ်းကြည့်ပါ။ နိုင်ငံခြားမှာ အသက် ၁၈ နှစ်ပြည့်ရင် Adult ဖြစ်ပြီလို့ယူဆကြပြီး မိဘဆီကအထောက်အပံ့ကိုမယူတော့ဘဲ ကိုယ့်ခြေထောက်ပေါ်ကိုယ်ရပ်နို်င်အောင်ကြိုးစားကြပါတယ်။ သင်ရော မိဘအကူအညီမပါဘဲနဲ့ ကိုယ့်ခြေထောက်ပေါ်ကိုရပ်နိုင်ပြီလား?   ၂။ သမာအာဇီဝကျတဲ့ ဘယ်အလုပ်မျိုးမဆို လုပ်နိုင်အောင်ကြိုးစားပါ။ ဒုတိယတစ်ချက်အနေနဲ့ သင်ဟာဘယ်အောက်ခြေသိမ်းဘယ်အလုပ်မဆို လုပ်တတ်အောင်ကြိုးစားပါ။ ဒါမှလည်း မိမိက ထိပ်တစ်နေရာရောက်တဲ့အခါ သင့်လက်အောက်ငယ်သားက သင့်ကိုလိမ်နေတာလား၊ သူအမှန်ပြောနေတာလား ဆိုတာကို သင်ဆုံးဖြတ်နိုင်မှာပါ။ ၃။ ဘွဲ့လက်မှတ်နဲ့သင်တန်းဆင်းလက်မှတ်များအား အကျိုးရှိရှိအသုံးချပါ။ ယနေ့ခေတ်လူငယ်အများစုဟာ ဘွဲ့ရတာကတခြား၊ အလုပ်လုပ်နေတဲ့အပိုင်းကတခြားဖြစ်တတ်ပါတယ်။ မိမိတို့သုံးလေးနှစ်တက်ထားတဲ့လက်မှတ်ကြီးဟာ အလကားဖြစ်နေတတ်ပါတယ်။ အကယ်၍ မိမိတက်ခဲ့တာနဲ့ အလုပ်လုပ်နေတာနဲ့မတူရင်တောင် မိမိတတ်တဲ့ပညာရပ်ကို မေ့မသွားအောင်တစ်ဖက်နည်းလမ်းကနေလေ့လာနေပါ။ အကောင်းဆုံးကတော့ မိမိလေ့လာထားတာနဲ့ အလုပ်လုပ်နေတာ တစ်ထပ်ထဲကျနေရင်တော့အကောင်းဆုံးပါပဲ။ ၄။ တစ်ခုခုကိုတတ်မြောက်အောင်မြင်ချင်တယ်ဆိုရင် ရှက်တတ်တဲ့စိတ်ကိုဖျောက်ပါ။ မိမိမသိရင်မှားသွားမှာစိုးပြီး မမေးရဲဘဲ ရှက်ကြောက်ကြပါတယ်။ အသိပညာတစ်ခုခုတတ်မြောက်ချင်ရင် ရှက်နေလို့မရပါဘူး။ ကိုယ်မသိတာရှိရင် သိတဲ့လူကိုဆရာတင်ပြီး မေးပါ။ ရှက်တဲ့စိတ်ဟာ သင့်ကိုအကြီးမားဆုံးအနှောင့်အယှက်ပေးနေပါလိမ့်မယ်။ ၅။ မိမိကိုယ်ကိုနှိမ့်ချပါ။ မာန်မာနများကိုလည်း တတ်နိုင်သလောက်လျှော့ပါ။ ဒီအချက်ကလည်း အောင်မြင်တဲ့သူတွေဆီမှာ အတွေ့ရဆုံးအချက်ပါ။ ပညာတတ်လေလေ ကိုယ့်ကိုယ်ကိုနှိမ့်ချလေလေပါ။ မိမိသိထားတတ်ထားသောအရာကို သူတစ်ပါးသိအောင်နားလည်အောင်ပြောဆိုရှင်းပြပြီး မာန်မာနမထားခြင်းဟာလည်း လူချစ်လူခင်ပေါများပြီး သင်ဘာလုပ်လုပ်အောင်မြင်နိုင်မှာပါ။ ၆။ အလုပ်တစ်ခုအားစွဲစွဲမြဲမြဲလေ့လာဆည်းပူးလုပ်ဆောင်ပါ။ ဒီအချက်ကလည်း အောင်မြင်တိုးတက်ရန် အရေးကြီးဆုံးအချက်တစ်ချက်ပါ။ ယနေ့ခေတ်လူငယ်တွေတင်မကပါဘူး လူလတ်ပိုင်းတွေကပါ အလုပ်မှာအဆင်မပြေရင် အဆင်မပြေမှုကိုပြေလည်အောင်မလုပ်ကြပါဘူး။  အလုပ်ပြောင်းချင်နေကြတဲ့လူတွေချည်းပါပဲ။ အဓိကကတော့ငွေကြောင့်ပါပဲ။ ကိုယ်ဝါသနာပါတဲ့အလုပ်ကိုစွဲစွဲမြဲမြဲနဲ ့ တစ်စိုက်မတ်မတ်လုပ်လျှင် သူတစ်ပါးနဲ့ယှဉ်လိုက်ရင် မိမိကသာနေမှာပါ။ ၇။ ငွေကိုအဓိကမထားပါနဲ့။ စေတနာနဲ့အလုပ်လုပ်ပါ။ လူတိုင်းလူတိုင်းဟာ ငွေနောက်လိုက်တဲ့လူတွေချည်းပါပဲ။ ဒီအချက်ကအကြီးအမားဆုံးအမှားတစ်ချက်ပါ။ ငွေမျက်နှာ တစ်ခုထဲကြည့်ပြီး အလုပ်မလုပ်ပါနဲ့။ စေတနာထားပြီးအလုပ်လုပ်တတ်ပါစေ။ စေတနာပြည့်လျှင် သင်ထိုက်တန်သလောက်ပြန်ရမှာပါ။ ၈။ သစ္စာရှိမှု၊ ကတိတည်မှုတွေနဲ့ ရိုးသားမှုတွေဟာ လူတိုင်းသင့်ကိုယုံကြည်လာပါလိမ့်မယ်။ သင်ဘာလုပ်လုပ်သစ္စာရှိပါ။ ကတိတည်ပါ။ ရိုးသားပါစေ။ အသေးအမွှားလေးကအစဂရုစိုက်ပါ။ အလုပ်ခွင်မှာမှ မဟုတ်ပါဘူး။ လူမှုဆက်ဆံရေးတွင်လည်းအသုံးချပါ။ သင်ဘာလုပ်လုပ်သင့်ကိုလူတိုင်းကယုံကြည်လာမှာပါ။ ၉။ တတ်နိုင်သမျှအကောင်းဘက်ကပဲတွေးပါ။ Positive Thinking ကလည်း လူတိုင်းလူတိုင်းမှာတွေ့ရနည်းပါတယ်။ ဒါပေမယ့်ဖြစ်နိုင်ရင် အနည်းနဲ့အများတော့ အကောင်းဘက်ကတွေးပြီး ဆုံးဖြတ်ချက်ချနိုင်ပါစေ။ ၁၀။ စိတ်ရှည်ပါ သည်းခံပါ။ ခွင့်လွှတ်တတ်အောင်ကြိုးစားပါ။ ဘယ်အလုပ်မဆို စိတ်ရှည်ရှည်နဲ့လုပ်ပါ။ သင်မှားလျှင်သင့်ကိုဟားတိုက်ရယ်ကြမှာထုံးစံပါ။ သင့်ကို လှောင်ပြောင်ရယ်သော သူတွေကိုကျေးဇူးတင်ပါ။ ခွင့်လွှတ်တတ်ပါစေ။ ထို့သူတွေကသာသင့်ကိုရှေ့ဆက်နိုင်အောင်တွန်းအားတွေဖြစ်စေမှာပါ။ ဒါမှလည်းကိုယ့်ကိုယ်ကိုတစ်ဆင့်ပြီးတစ်ဆင့်ကောင်းသထက်ကောင်းအောင် တိုးတက်စေမှာပါ။    

နေ့စဉ်လုပ်ငန်းခွင်နှင့်ဘဝမှာ မိမိကိုယ်ကို ကျဆုံးခြင်းဖြစ်လာစေတဲ့ အဆင့် ၃ ဆင့်  ပထမဆုံး ဒီ Topic လေးကိုရွေးချယ်ရေးသားရတဲ့အကြောင်းအရင်းကတော့ လုပ်ငန်းခွင်ဟာပုံမှန်အားဖြင့် လူတွေရဲ့အချိန်အများဆုံးကုန်ဆုံးတတ်တဲ့ နေရာတစ်ခုပါ။ ဒါကြောင့် သင်ဟာလုပ်ငန်းခွင်မှာ စိတ်မပါဘူး၊ မပျော်ရွှင်တော့ဘူး၊ သင့်ကိုယ်သင်လမ်းပျောက်နေတယ်လို့ခံစားနေရရင် သင့်ရဲ့ Personal Life မှာပါ အနည်းနဲ့အများ သက်ရောက်မှုရှိနိုင်ပါတယ်။ အထူးသဖြင့် အခုလို Covid-19 ဖြစ်နေတဲ့ကာလမှာဆိုရင် လူအများစုဟာ အကြောင်းအမျိုးမျိုးကြောင့် ကိုယ့်ရဲ့လက်ရှိအလုပ်နဲ့နေ့စဉ်လူမှုဘဝမှာ မိမိကိုယ်ကိုစိတ်တိုင်းမကျဘဲ စိတ်ဓာတ်ကျလာတာတွေ ကြုံနေရတယ်ဆိုရင် ကိုယ်ဘာကြောင့် ဒီလိုတွေ ဖြစ်နေရလဲဆိုတာ ဆန်းစစ်ကြည့်လို့ရအောင် ရည်ရွယ်ပါတယ်။ ဖော်ပြပါအကြောင်းအရာများကို James Clear ရဲ့ 3 Stages of Failure in Work and Life ဆိုတဲ့အဆိုကနေ ကောက်နှုတ်တင်ပြထားပါတယ်။ The Three Stages of Failure ကျဆုံးမှုကိုဖြစ်စေတဲ့ အဆင့် ၃ ဆင့် Failure of Tactics Failure of Strategy Failure of Vision ​ Ref Imange : James Clear ​ 1. Failure of Tactics - How မိမိရည်မှန်းထားတဲ့အလုပ်ဘယ်လိုပြီးမြောက်အောင်လုပ်မလဲမသိသောကြောင့်ကျဆုံးခြင်း အလုပ်သေးသေးဖြစ်စေ၊ ကြီးကြီးဖြစ်စေ ပန်းတိုင်တစ်ခုထားသင့်ပါတယ်။ ကိုယ်လိုချင်တဲ့ ပန်းတိုင်ဆီရောက်အောင် ကိုယ်ဘယ်လိုနည်းလမ်းနဲ့ကြိုးစားသင့်လဲ၊ ကိုယ့်ရဲ့အောင်မြင်မှုကို ကိုယ်ဘယ်လိုတိုင်းတာမလဲ ဆိုတာမျိုးမသိချိန်မှာ ကျဆုံးပါတယ်။ အဓိက ကတော့ ကိုယ်လိုချင်တဲ့အရာရအောင် ဘယ်လိုနည်းလမ်းနဲ့ လုပ်ဆောင်မလဲဆိုတာသိဖို့လိုအပ်ပါတယ်။ ​ 2. Failure of Strategy - What နည်းလမ်းမှားရွေးချယ်ခြင်းကြောင့်ကျဆုံးခြင်း အလုပ်တစ်ခုကိုပြီးမြောက်အောင်လုပ်ဆောင်နိုင်တဲ့ နည်းမျိုးစုံရှိပါတယ်။ အဲ့လိုအများကြီးထဲကမှ ကိုယ်ရွေးချယ်လိုက်တဲ့နည်းလမ်းကမှားယွင်းနေမယ်ဆို အဲ့နည်းလမ်းတစ်ခုကိုပဲ အောင်မြင်အောင် အစွဲကြီးပြီးကြိုးစားနေတာဟာ စိတ်ပင်ပန်း၊လူပင်ပန်းလာစေပါတယ်။ အဲ့လိုမဖြစ်ရအောင် ကိုယ်ရဲ့အဓိက ရည်ရွယ်ချက်ကဘာလဲ၊ ကိုယ်လိုချင်တဲ့ရလဒ်ရအောင် နည်းမှန်လမ်းမှန်လုပ်ဆောင်ဖို့လိုအပ်ပါတယ်။ ​ 3. Failure of Vision - Why မိမိဘာကြောင့်ကျဆုံးလဲဆိုတာမသိသောကြောင့် ကျဆုံးခြင်း နားလည်လွယ်အောင်ပြောရမယ်ဆိုရင်တော့ ဘာကြောင့်ကိုယ်လုပ်နေတဲ့အလုပ်ကိုလုပ်နေရတာလဲ ဆိုတာကို ကိုကိုယ်တိုင်သိဖို့လိုအပ်ပါတယ်။ကိုယ်တကယ်လိုချင်နေတာ ကိုယ်မသိရင် ကိုယ့်တစ်နေ့တာလုပ်ငန်းစဉ်က ဦးတည်ချက် မရှိဘဲ အချိန်ကြာလာရင် ကိုယ့်ကိုယ်ကိုလည်းအလိုမကျတာတွေ၊ နေ့စဉ်အလုပ်ကို ငြီးငွေ့လာတာ၊ Motivation ကျလာတာတွေဖြစ်လာနိုင်ပါတယ်။ ဒါကြောင့် မိမိကိုယ်ကိုမြင်အောင်ကြည့်တတ်ဖို့လိုအပ်ပါတယ်။ ဒီစာစုလေးကိုဖတ်ပြီး အားလုံးမိမိရဲ့ နေ့စဉ်လူနေမှုဘဝမှာရော၊ လုပ်ငန်းခွင်မှာပါ သယဇာတဖြစ်အောင်၊ ဦးတည်ချက်တွေရှိနေအောင်၊ Motivation မကျအောင် မိမိကိုယ်ကို ဘယ်လိုတိုင်းတာကြည့်ကြမလဲဆိုတာ အကြမ်းဖျဉ်း လေ့လာနိုင်ကြပါစေ။ ​ Ref Link : https://medium.com/the-mission/the-3-stages-of-failure-in-life-and-work-and-how-to-fix-them-5d69196e0b38

Business Call ခေါ်ဆိုရာတွင် လိုက်နာသင့်သော အခြေခံ ၅ ချက် လုပ်ငန်းခွင်က ဝန်ထမ်းများအနေနဲ့ အလုပ်ကိစ္စနဲ့ဖုန်းခေါ်တဲ့အခါ (သို့) ဖုန်းလက်ခံပြောတဲ့အခါ လိုက်နာသင့်တဲ့အချက်များကို ဖော်ပြပေးလိုက်ပါတယ်။  1. Identify yourself. (ကိုယ့်ကိုယ်ကို မိတ်ဆက်ပါ။)  ကိုယ့်ဘက်ကနေ ဖုန်းစခေါ်တဲ့အခါ “ဘယ်သူ၊ဘယ်ဝါနဲ့ ဖုန်းပြောချင်ပါတယ်၊” “ ဘာအကြောင်းအရာပါ” လို့ မပြောခင် အရင်ဆုံး တစ်ဖက်က ဖုန်းဖြေတာနဲ့ ကိုယ့်ကိုယ့်ကို မိတ်ဆက်သင့်ပါတယ်။ ကိုယ့်ရဲ့ နာမည် နဲ့ Company နာမည် (လိုအပ်လျှင် ရာထူး) တို့ကို ပြောပြီးမှသာ ကိုယ်ဆက်သွယ်ချင်တဲ့ တစ်ဖက်လူကို ကိုယ်သိချင်တဲ့အကြောင်းအရာနဲ့ပတ်သက်ပြီး စမေးသင့်ပါတယ်။  2. Always know and state the purpose of the communication. (ကိုယ်ဖုန်းဆက်ရတဲ့ အကြောင်းအရင်းကို ကိုယ်တိုင်သေချာသိပါစေ။)  အလုပ်ကိစ္စနဲ့ ဖုန်းခေါ်တာဖြစ်တဲ့အတွက် ဘယ်သူနဲ့ “ ဘယ်အကြောင်းအရာ ပြောမယ်၊ ဘယ်ကိစ္စကိုတော့ မေးဖို့လိုတယ်၊ အတည်ပြုဖို့လိုတယ်” စသဖြင့် ဖုန်းမခေါ်ခင်ကတည်းက သေချာ စဉ်းစားထားသင့်ပါတယ်။  3. If you told a person you would call at a certain time, call them as you promised. (ဖုန်းဆက်မယ်လို့ ကတိပေးထားတဲ့ အချိန်အတိုင်း ဖုန်းဆက်ပါ။)  အလုပ်အရမ်းများလာတဲ့အခါ၊ တခြားအရေးကြီးကိစ္စတစ်ခုပေါ်လာတဲ့အခါမျိုးကျရင် တစ်ဖက်လူကို လုပ်ငန်းကိစ္စဖုန်းဆက်မယ်လို့ ပြောထားပြီးမှ မဆက်ဖြစ်တော့တဲ့ အခြေအနေမျိုး ကြုံလာတတ်ပါတယ်။ အဲဒီအခါကျရင် မဆက်ဖြစ်တဲ့အကြောင်းကို ကြိုပြီး ပြောပြထားသင့်ပါတယ်။ ကိုယ်ကိုယ်တိုင် ဖုန်းဆက်ပြောဖို့ လုံးဝ မအားလပ်တဲ့အခါမျိုးကျရင် တခြားတစ်ယောက်ယောက်ကို ဖုန်းဆက်ခိုင်းတာမျိုး (သို့) Email ပို့တာမျိုး လုပ်သင့်ပါတယ်။  4. Be sensitive to the tone of your voice. (အသံနေအသံထားမှန်မှန်နဲ့ ပြောသင့်ပါတယ်။)  တစ်ခုခုကိုစားရင်း (သို့) ၀ါးရင်း ပြောတာမျိုး၊ အသံအကျယ်ကြီး (သို့) ဗလုံးဗထွေးပြောတာမျိုးတွေကို လုံးဝရှောင်သင့်ပါတယ်။ အလုပ်ကိစ္စနဲ့ ဖုန်းဆက်တာဖြစ်တဲ့အတွက် ပုံမှန်လေသံ နဲ့ ယဉ်ကျေးတဲ့ အသုံးအနှုန်းတွေသုံးပြီး ပြောသင့်ပါတယ်။ မိခင်ဘာသာစကားမဟုတ်တဲ့ တခြားဘာသာစကားနဲ့ ပြောဆိုရတဲ့အခါ ပိုပြီး Formal ဖြစ်တဲ့ စကားလုံး၊ Business Term တွေကို အသုံးပြုသင့်ပါတယ်။  5. Do not allow interruptions to occur during conversations. (ဖုန်းပြောနေတုန်း တခြားကိစ္စများကို လက်ခံပြောဆိုတာမျိုး မပြုလုပ်ပါနဲ့။)  ဖုန်းပြောနေရင်း တစ်ယောက်ယောက်က Interrupt လုပ်ဖို့၊ စကားပြောဖို့ ကြိုးစားလာတဲ့အခါ (ကိုယ့်ရဲ့ အထက်လူကြီးပင် ဖြစ်ပါစေ) လျစ်လျူရှုထားလိုက်ပါ။ ဖုန်းပြောနေရင်း တခြားကိစ္စတစ်ခုကို ပြောဆို ဆောင်ရွက်တာဟာ တစ်ဖက်လူကို မလေးစားရာ ရောက်ပါတယ်။  အထက်မှာ ဖော်ပြခဲ့တဲ့ အချက်တွေကို လိုက်နာပြီး ပြောဆိုဆက်ဆံတဲ့အခါ အလုပ်ကိစ္စတွေ ပိုမိုမြန်ဆန်ချောမွေ့လာမှာ ဖြစ်တဲ့အပြင် ကိုယ်က တလေးတစား ပြုမူထားတဲ့အတွက် အလုပ်ရှင်များသာမက လုပ်ဖော်ကိုင်ဖက်များကပါ ကိုယ့်ကို Communication Skill ကောင်းတဲ့သူတစ်ယောက်၊ Ethic ရှိတဲ့သူတစ်ယောက်အဖြစ် သတ်မှတ်လာတာကို တွေ့မြင်ရမှာဖြစ်ပါတယ်။

အမြဲနောက်ကျတတ်တဲ့သူတွေအတွက် နည်းလမ်းကောင်း ၅ ခု ချိန်းထားတဲ့အချိန်ထက်နောက်ကျပြီးမှရောက်တယ်ဆိုတာ ကျွန်မတို့ပတ်ဝန်းကျင်မှာ ဖြစ်လေ့ဖြစ်ထရှိတဲ့သဘောလိုမျိုးတောင် အခုနောက်ပိုင်းမှာဖြစ်လာပါတယ်။ သူငယ်ချင်းတွေနဲ့တွေ့တဲ့အခါ နောက်ကျတာ၊ အပြင်သွားဖို့နောက်ကျတာ၊ ချိန်းဆိုထားတာတွေနောက်ကျတာစသည်ဖြင့် အမျိုးမျိုးနောက်ကျတတ်ကြပါတယ်။ ဒါပေမဲ့ အရေးကြီးကိစ္စတွေအတွက် ချိန်းဆိုမှုတွေ လုပ်တဲ့အခါမှာတော ့နောက်မကျသင့်ပါဘူး။ တကယ်လို့ ကိုယ့်မှာနောက်ကျတတ်တဲ့ အကျင့်လေးရှိနေပြီဆိုရင်တော့ အခုပြောမယ့်နည်းလမ်းလေးတွေကို စမ်းကြည့်ပြီးတော့ နောက်မကျအောင် လေ့ကျင့်သင့်ပါတယ်။ ၁။ ချိန်းတဲ့အချိန်ရောက်ခါနီး အာရုံလွဲစေမယ့်ကိစ္စလေးတွေ မလုပ်ပါနဲ့။ ဥပမာအနေနဲ့ဆိုရင် အပြင်သွားခါနီး ၅ မိနစ်လောက်အလိုလေးမှာ တခြားတစ်ယောက်နဲ့ ဖုန်းပြောတာတို့၊ Message ပို့တာမျိုးတို့ မလုပ်တာကောင်းပါတယ်။ ဖုန်းပြောနေရင်းနဲ့လည်း သွားလို့ရတယ်ဆိုပေမယ့် ဖုန်းပြောတဲ့အခါ မေ့သွားတာမျိုးဖြစ်တတ်ပါတယ်။ ဖုန်းပြောရင်း အရှိန်ပါသွားတာနဲ့၊ စကားစဖြတ်မရတာနဲ့ သွားမယ့်ကိစ္စတွေ နောက်ကျသွားနိုင်ပါတယ်။ အလားတူမလုပ်သင့်တဲ့အရာလေးတွေက Notification, Message, Email စစ်တာ၊၊ စကားစမြည်ပြောတာ၊ သတင်းစာ၊ ဂျာနယ် ယူဖတ်တာမျိုးတွေပေါ့။ ၂။ အချိန်ကြိုထွက်တဲ့အခါမှာ ပြဿနာတစ်ခုခုကြောင့် ကြာနိုင်မယ့်အချိန်ကိုပါ ကြိုတင်ထည့်တွက်ထားပါ။ ၁ နာရီနဲ့ရောက်မယ့်ခရီးကို ကွက်တိမတွက်ထားဘဲ ကားပျက်တာတွေ၊ ကားမရတာတွေ၊ ကားလမ်းပိတ်မှာတွေ၊ လမ်းမှာတစ်ခုခုကြောင့် ကြန့်ကြာမှာတွေအတွက်ပါ ထည့်တွက်ပြီး ၁၅ မိနစ်လောက်ကြိုထွက်ပါ။ ကိုယ်သွားမယ့်လမ်းမှာ ဖြစ်တတ်တဲ့ပြဿနာလေးတွေကို ကိုယ်ပဲသိနိုင်တဲ့အတွက် ဘယ်လောက်ကြာနိုင်မလဲ ကြိုမှန်းပြီး စောစောထွက်နိုင်လေ ကောင်းလေပါပဲ။ ဖြစ်နိုင်ရင် ချိန်းထားတဲ့နေရာကို စောရောက်နေရင် ဖတ်ဖို့ စာအုပ်တစ်အုပ်ပါယူသွားလိုက်ပါ။ ၃။ မနက်သွားရမယ့်ကိစ္စရှိရင် ညကတည်းက ကြိုတင်ပြင်ဆင်ပါ။ နောက်နေ့မနက်မှာ အရေးကြီးချိန်းထားတာရှိမယ်၊ Meeting ရှိမယ်ဆိုရင် ညကတည်းက ကြိုတင်ပြင်ဆင်ထားသင့်ပါတယ်။ ပြင်ဆင်တဲ့အခါမှာ အဆင်သင့်ဖြစ်အောင် အဝတ်အစား၊ ပိုက်ဆံ၊ ဖုန်း စတာတွေကို ယူရလွယ်ကူတဲ့နေရာမှာ အဆင်သင့်ယူလို့ရအောင်ထားတာမျိုး လုပ်သင့်ပါတယ်။ ၄။ နည်းပညာအကူအညီနဲ ့ Reminder တွေသုံးပါ။ ပုံမှန်အားဖြင့်တော့ Google Calendar မှာပါတဲ့ Reminder ကို သုံးနိုင်ပါတယ်။ ကိုယ်လုပ်ရမယ့်ကိစ္စမတိုင်မီ အချိန်တစ်ခုသတ်မှတ်ပြီး Remind ပေးလို့ရပါတယ်။ ဥပမာ ညနေ ၆ နာရီသွားစရာရှိတယ်ဆိုပါစို့။ သွားဖို့ကြာချိန်ကနာရီဝက်၊ ပြင်ဆင်ချိန်ကနာရီဝက်၊ စုစုပေါင်း ၁ နာရီ Reminder ပေးထားလို့ရပါတယ်။ ဒါဆို ဖုန်းက ကိုယ်မသွားခင် တစ်နာရီအလို ညနေ ၅ နာရီထိုုးလောက်ဆိုရင် အချက်ပေးပါတယ်။ ၅။ အချိန်ဘယ်လောက်ကြာတတ်လဲဆိုတာလေ့လာပါ။ ကိုယ်ကအပြင်သွားရမယ်ဆိုရင် ကိုယ်သွားတဲ့ခရီးဘယ်လောက်ကြာတတ်လဲဆိုတာ အမြဲလေ့လာပါ။ အခု မြန်မာနိုင်ငံရဲ့ Traffic က လမ်းချင်းတူပေမဲ့ အချိန်မတူရင် ပိုကြာတာမျိုးရှိသလို၊ ရက်မတူရင်လည်း ပိုကြာတာမျိုးဖြစ်တတ်ပါတယ်။ သွားတဲ့လမ်းခရီးပဲ မဟုတ်ပါဘူး။  ပြင်ဆင်ချိန်ကိုလည်း သတိထားလေ့လာသင့်ပါတယ်။ ပုံမှန်ခြေညှပ်ဖိနပ်နဲ ့သွားတဲ့အချိန်မှာ စက္ကန့်ပိုင်းပဲကြာပေမဲ့ Shoe စီးပြီးသွားမယ်ဆိုရင် မိနစ်ပိုင်းလောက်ကြာသွားနိုင်ပါတယ်၊  အကျီင်္ဝတ်တဲ့အခါလည်း အလားတူပါပဲ။ ဒီအချိန်လေးတွေဟာ တစ်ခုချင်းဆီဆိုရင်တော့ သိပ်မသိသာပေမယ့် အားလုံးပေါင်းလိုက်ရင် ၁၀ မိနစ်လောက် ကြာသွားနိုင်ပါတယ်။ အဲ့ဒါကြောင့် ကိုယ်ဘယ်လောက်အချိန်ယူလဲဆိုတာ သတိထားလေ့လာသင့်ပါတယ်။  တန်ဖိုးရှိတဲ့ကိုယ့်ရဲ့အချိန်တွေကို ကောင်းကောင်းအသုံးချနိုင်ဖို့အတွက် အလေ့အကျင့်လုပ်ရတာလည်း လွယ်ကူတဲ့ဒီအချက် ၅ ချက်ကို လိုက်နာကြည့်ဖို့တိုက်တွန်းလိုက်ပါတယ်။  

Interview အောင်မြင်စေမယ့် အချက် ၅ ချက် အလုပ်နဲ့ပတ်သက်ပြီး Interview ဖြေတဲ့အခါမှာ လူတိုင်းအနည်းနဲ့အများတော့ စိုးရိမ်စိတ်တွေရှိတတ်ကြပါတယ်။ အလုပ်အတွက်လိုအပ်တဲ့အရည်အချင်းတွေ ကိုယ့်မှာအပြည့်ရှိပေမယ့် Interview မှာသေချာမဖြေဆိုနိုင်တာကြောင့် Offer Letter နဲ့လွဲချော်ခဲ့တဲ့လူတွေလည်း မနည်းပါဘူး။ ဒါကြောင့် အလုပ်ရှာနေတဲ့သူတိုင်းအတွက် Interview ဖြေဆိုအောင်မြင်စေမယ့် အဓိက သော့ချက် ၅ ချက်ကို MyWorld Careers ကမျှဝေပေးလိုက်ပါတယ်။​ (၁) ကြိုတင်ပြင်ဆင်ထားပါ။ အလုပ် Interview မဖြေဆိုခင်မှာ သင့်တော်တဲ့ကြိုတင်ပြင်ဆင်မှုတွေပြုလုပ်ထားသင့်ပါတယ်။ Company အကြောင်းကြိုတင်လေ့လာထားတာ၊ အလုပ် Position နဲ့ပတ်သက်တဲ့ Industry Knowledge တွေရှာဖွေဖတ်ရှုထားတာ စတဲ့အချက်အလက်ဆိုင်ရာ ပြင်ဆင်မှုတွေနဲ့အတူ ကိုယ့်ရဲ့ အားသာချက်၊ အားနည်းချက်တွေကိုကြိုတင်ဆန်းစစ်ထားတာမျိုးတွေလည်းပြုလုပ်သင့်ပါတယ်။ ဒီလိုအဘက်ဘက်ကကြိုတင်ပြင်ဆင်ထားခြင်းဟာ Interview အောင်မြင်စေဖို့ကြီးမားတဲ့အထောက်အကူတစ်ခုပါပဲ။​ (၂) Professional ကျကျဝတ်ဆင်ပါ။ သင့်ကိုပထမဆုံးတွေ့လိုက်တဲ့အချိန်က First Impression ဟာသင့်ရဲ့ Interview ရလဒ်ပြောင်းလဲသွားစေနိုင်ပါတယ်။ Interviewer တစ်ယောက်အနေနဲ့ သင့်ကိုအကဲဖြတ်တဲ့နေရာမှာ သင့်ရဲ့ဝတ်စားဆင်ယင်မှုကလည်း တစ်စိတ်တစ်ပိုင်းအနေနဲ့ပါဝင်ပါတယ်။ ဒါကြောင့်အလုပ် Interview သွားတဲ့နေရာမှာ အလုပ်နဲ့သင့်တော်တဲ့ Professional ဆန်ဆန် Outfit မျိုးဝတ်ဆင်တတ်ဖို့လိုပါတယ်။​ (၃) Interview Skill ကိုပြန်လေ့ကျင့်ပါ။ အလုပ် Interview ဖြေတဲ့အခါမှာ ကိုယ့်ရဲ့ Interviewer နဲ့ ဘယ်လို Interact လုပ်မလဲဆိုတာကြိုတင်ပြင်ဆင်ထားတာမျိုး၊ ကိုယ့်ရဲ့ကျွမ်းကျင်မှုတွေနဲ့လုပ်ငန်းခွင်အတွေ့အကြုံတွေကို Resume မှာသေချာပြင်ဆင်လာတာမျိုးပြုလုပ်သင့်ပါတယ်။ Interview ခန်းထဲမဝင်ခင်မှာလည်း ကိုယ့်ရဲ့ Resume ကို အမှားအယွင်းမရှိစေဖို့တစ်ချက်ပြန်စစ်တာမျိုးပြုလုပ်ပေးပါ။​ (၄) စိုးရိမ်စိတ်တွေလျှော့ချပေးပါ။ အလုပ် Interview တိုင်းမှာလူတိုင်းစိုးရိမ်တတ်ကြတာသဘာဝပါ။ အလုပ် Position နဲ့ပတ်သက်ပြီးသေချာလေ့လာထားမယ်၊ ကြိုတင်ပြင်ဆင်လာမယ်၊ Negative အတွေးတွေမတွေးမိအောင်နေမယ်၊ Interview အောင်မြင်ဖို့ကိုပဲအာရုံစိုက်မယ် စတဲ့အချက်တွေကို လိုက်နာမယ်ဆိုရင် Interview နဲ့ပတ်သက်တဲ့စိုးရိမ်စိတ်တွေ လျှော့ပါးသွားစေမှာပဲဖြစ်ပါတယ်။​ (၅) အကောင်းဆုံးလုပ်ဆောင်ပါ။ ဒါဟာ အလုပ် Interview ဖြစ်တဲ့အတွက် ကိုယ့်ရဲ့အရည်အချင်းတွေနဲ့ အတွေ့အကြုံတွေဟာ ဒီ Position နဲ့ Organization အတွက်ကိုက်ညီမှုရှိကြောင်း၊ အသင့်တော်ဆုံးဖြစ်ကြောင်း သေချာရှင်းလင်းတင်ပြနိုင်ဖို့လိုပါတယ်။ Interviewer ရဲ့သဘောထားနဲ့အမြင်တွေကို သင့်ဘက်ရှိနေစေဖို့ ကြိုတင်ပြင်ဆင်မှုတွေ၊ စကားလုံးအသုံးအနှုန်းတွေနဲ့ လက်ဟန်ခြေဟန်တွေအသုံးပြုပြီး ယုံကြည်ချက်ရှိရှိနဲ့ အကောင်းဆုံးတင်ပြဆွေးနွေးမှုတွေပြုလုပ်ပါ။​ အထက်မှာဖော်ပြခဲ့တဲ့အချက်တွေကို လိုက်နာဆောင်ရွက်ခြင်းအားဖြင့် အလုပ် Interview တိုင်းကိုအခက်အခဲမရှိအောင်မြင်စွာဖြေဆိုနိုင်ဖို့အထောက်အကူဖြစ်စေမှာဖြစ်ပါတယ်။