How to Enjoy and Make the Most of Your Personal Time

ကိုယ့်ရဲ့ကိုယ်ပိုင်အချိန်တွေမှာ ပျော်ရွှင်အောင်ဘယ်လိုနေထိုင်မလဲ?

ပြောင်းလဲလာတဲ့ခေတ်ရေစီးကြောင်းနဲ့အညီ ကုန်ပစ္စည်းတွေစားသောက်နေထိုင်မှုစရိတ်တွေကလည်း တစ်ဟုန်ထိုးမြင့်တက်လာပါတယ်။ ထိုအရာတွေကို Cover ဖြစ်ဖို့အတွက် လူတိုင်းပိုက်ဆံနောက်ကိုလိုက်မှန်းမသိလိုက်လာကြပြီး ကိုယ်ပိုင်အချိန်တွေပျောက်ဆုံးမှန်းမသိပျောက်ဆုံးလာကြတယ်။ ပျော်ရွှင်မှုဆိုတာဘာမှန်းမသိအောင်ဖြစ်လာကြပြီး အလုပ်ခွင်မှာလုပ်ရတာစိတ်ဖိစီးမှုတွေပိလာကြပါတယ်။ ဒါတွေကိုဘယ်လိုလျှော့ချပြီး ပျော်ရွှင်မှုကိုဘယ်လိုဖန်တီးယူရမလဲဆိုတာကို ဒီဆောင်းပါးလေးမှာပြောပြပေးချင်ပါတယ်။

(၁) တစ်နေ့ကိုအနည်းဆုံးတစ်နာရီလောက် ဝါသနာပါတာကိုလုပ်ပါ။
လူတိုင်းမှာကိုယ်ဝါသနာပါတာ အနည်းဆုံးတစ်ခုလောက်တော့ရှိပါတယ်။ တချို့ကစာဖတ်တာသဘောကျတယ်။ တချို့ကတော့သူငယ်ချင်းတွေနဲ့အပြင်သွားတာသဘောကျကြတယ်။ တချို့ကျတော့ပန်းချီဆွဲတာ အစရှိသည်ဖြင့်ပေါ့။ ဒါပေမယ့် တစ်နေ့တစ်နေ့လုပ်ရတဲ့ Funtions တွေကများနေလို့ဆိုပြီး ကိုယ်ဝါသနာပါရာကို သေချာအချိန်မပေးနိုင်ကြပါဘူး။ “အလုပ်ကပြန်လာတော့ပင်ပန်းပြီးမလှုပ်နိုင်တော့ဘူး” ဆိုတဲ့ဆင်ခြေတွေနဲ့ ကိုယ်ရဲ့ပျော်ရွှင်စရာအချိန်တွေကိုလက်လွှတ်လိုက်ကြပါတယ်။ တကယ်တော့ကိုယ်တကယ်ဝါသနာပါတာလေးတစ်ခုက ကိုယ့်ရဲ့အလုပ်ပင်ပန်းမှုတွေကို ဖြေဖျောက်ပေးနိုင်တယ်ဆိုတာမသိကြသေးလို့ပါ။ တစ်နေ့ကို အနည်းဆုံးအချိန်တစ်နာရီလောက်ပေးပြီး ကိုယ်ဝါသနာပါရာတစ်ခုခုကိုလုပ်ကြည့်ပါ။

(၂) ဘာသာစကားအသစ်တစ်ခုကိုသင်ယူပါ။
ဒီနေရာမှာ English ဘာသာစကားတစ်မျိုးထဲကိုမဆိုလိုပါဘူး။ ကိုရီးယား၊ ဂျပန်၊ တရုတ် စသဖြင့်ကိုယ်စိတ်ဝင်စားတဲ့ဘာသာစကားတစ်ခုခုပေါ့။ တချို့ကတော့စာကျက်ရတာပိုပင်ပန်းတယ်လို့ထင်ကြပါလိမ့်မယ်။ တကယ်တော့မဟုတ်ပါဘူး။ အားလပ်ချိန်မှာကိုယ်မသိသေးတဲ့ ဘာသာစကားအသစ်တစ်ခုကိုသင်ယူရတာဟာ အလုပ်ခွင်ရဲ့ပြဿနာတွေကိုမတွေးမိတော့တဲ့အပြင် ကိုယ့်ဦးနှောက်ရဲ့စွမ်းဆောင်ရည်ကိုလည်းမြင့်တက်စေနိုင်ပါတယ်။ အလုပ်မအားလို့မတက်နိုင်ပါဘူး ဆိုတာမျိုးကိုမေ့ပစ်ပီးအချိန်ပေးကြည့်ပါ။ ကိုယ်အသက်ရှိနေသ၍ အလုပ်တာဝန်တွေဆိုတာပြီးဆုံးမှာမဟုတ်တဲ့အတွက် ကိုယ့်အတွက်တိုးတက်မှုရှိစေမယ့်၊ စိတ်အပန်းပြေစေမယ့်အရာတွေပေါ်မှာလည်း အချိန်ပေးပါ။

(၃) မိသားစုနဲ့အချိန်ပေးပြီးခရီးထွက်ပါ။
လူတိုင်းဟာအလုပ်ဆိုတဲ့သံသရာထဲမှာလည်ပတ်နေကြပြီး အားလပ်ချိန်တွေပျောက်ဆုံးကာ မိသားစုနဲ့ပါဝေးကွာမှုတွေဖြစ်လာကြပါတယ်။ အလုပ်ကပင်ပန်းပီးပြန်လာရင် ဘယ်သူနဲ့မှစကားမပြောချင်ဘဲအိပ်ရာထဲဝင်ပီးအိပ်ပျော်၊ ဒီလိုနဲ့ပဲတစ်နေ့တာကိုကုန်ဆုံးသွားရကြတယ်။ နေ့စဉ်သူစိမ်းတွေကို ကောင်းကောင်းဆက်ဆံနေပေမယ့် အလုပ်မှာဖြစ်လာတဲ့ စိတ်မကျေနပ်မှုတွေ၊ စိတ်ဖိစီးမှုုတွေကြောင့် ကို်ယ့်ရဲ့အရင်နှီးဆုံးအိမ်သားတွေအပေါ်မှာ ကောင်းကောင်းမဆက်နိုင်တော့ပါဘူး။ ကြာလာတော့ တစ်ယောက်နဲ့တစ်ယောက်စကားမပြောဖြစ်ကြတော့ဘဲ မိသားစုပျော်ရွင်စရာကိုယ်ပိုင်အချိန်တွေလည်းပျောက်ဆုံးသွားပါတယ်။ ဘယ်လောက်ပဲအရေးကြီးတဲ့အလုပ်ဖြစ်နေပါစေ၊ မိသားစုလောက်တော့အရေးမကြီးပါဘူး။ နေ့တိုင်းအချိန်မပေးနိုင်ဘူးဆိုရင်တောင်မှ အားလပ်ချိန်လေးတွေဖန်တီးပြီး သူတို့နဲ့အတူနေရာသစ်လေးတွေကိုခရီးထွက်ကြည့်ပါ။ အရင်ကထက်ပိုပြီး မိသားစုုနွေးထွေးမှုတွေ၊ ပျော်ရွှင်မှုလေးတွေရှိလာမှာပါ။

(၄) ပြဿနာကိုကြာကြီးစိတ်ထဲမှာမမွေးမြူပါနဲ့။
လူတိုင်းမှာအလုပ်ပြဿနာ၊ မိသားစုပြဿနာ၊ Relationship ပြဿနာ စသဖြင့် တစ်ခုမဟုတ်တစ်ခုကတော့ရှိစမြဲပါ။ ဘယ်တော့မှပြီးဆုံးသွားတယ်ဆိုတာမရှိပါဘူး။ အဓိကက ကိုယ်စိတ်သက်သာအောင်ဘယ်လိုဖန်တီးနေထိုင်မလဲဆိုတာပါပဲ။ ဘာပြဿနာပဲဖြစ်ဖြစ်ခေါင်းထဲမှာတစ်ချိန်လုံးမထည့်ထားပါနဲ့။ ဥပမာ အလုပ်ကပြဿနာကိုအလုပ်မှာပဲထားခဲ့ပြီး အိမ်ကိုသယ်မလာတာမျိုး သို့မဟုတ် အိမ်ကပြဿနာကိုအလုပ်ထိသယ်မလာတာမျိုးပေါ့။ တစ်ချိန်လုံးစိတ်ညစ်စရာတွေခေါင်းထဲပြည့်နေရင် ပျော်စရာဆိုတာရှာမတွေ့နိုင်တော့ပါဘူး။

(၅) ကိုယ့်ရဲ့အချိန်တွေကိုတခြားသူဆီမပါပါစေနဲ့။
အထူးသဖြင့် ကျွန်မတို့မြန်မာလူမျိုးတွေဟာအားနာတတ်ပါတယ်။ ကိုယ့်အတွက်အရေးမပါတဲ့အရာတွေကို "No" လို့ပြောရမှာဝန်လေးတတ်ကြပါတယ်။ ကိုယ့်ရဲ့အားလပ်ချိန်မှာ တခြားသူတယောက်ကအရေးမပါတာတွေလာပြောနေတာပဲဖြစ်ဖြစ်၊ သူ့အလုပ်ရဲ့သူတွေမကောင်းကြောင်းတွေလာပြောနေတာပဲဖြစ်ဖြစ် ငြင်းတတ်အောင်ကြိုးစားပါ။ ကိုယ့်ရဲ့အားလပ်ချိန်တွေကိုတန်ဖိုးထားပြီး အားမနာတတ်အောင်ကြိုးစားပါ။ မဟုတ်ရင်သူ့ရဲ့ပြဿနာတွေဟာကိုယ့်ရဲ့ပျော်ရွှင်မှုတွေကိုပါဖျက်စီးနိုင်ပါတယ်။